बैंकक : थाइल्याण्डमा गत आइतबार भएको मतदानबाट पालङ प्रचा रथ पार्टीले सबैभन्दा धेरै मत पाएको छ ।
निर्वाचन आयोगले बिहीबार सार्वजनिक गरेको विवरणअनुसार पालङ पार्टीले सवैभन्दा धेरै मत पाएपनि फिउ थाई पार्टीले सबैभन्दा धेरै सिटमा जीत हासिल गरेको छ ।
देशभरको मतगणना सम्पन्न भएपछि आयोगले पालङ पार्टीले ८४ लाख ३० हजार मत प्राप्त गरेको छ भने त्यसलाई पछ्याउँदै फिउ थाई पार्टीले ७९ लाख २० हजार मत पाएको छ ।
मतका आधारमा तेस्रो भएको फ्युचर फरवार्ड पार्टीले ६२ लाख ६० हजार मत पाएको निर्वाचन आयोगको विवरणमा उल्लेख छ ।
त्यसैगरी डेमोक्रेट्स पार्टीले ३९ लाख ४० हजार मत ल्याउँदा भुम्जै थाई पार्टीले ३७ लाख ३० हजार मत पाएको छ ।
पार्टीतर्फको मत प्रचा रथले सबैभन्दा धेरै पाए पनि सांसद नै विजयी हुनेको संख्या भने फिउ थाईको सबैभन्दा बढी रहेको छ ।
कुल पाँच सय सिटमा फिउ थाईले सबैभन्दा धेरै अर्थात् १३७ सिटमा जीत हासिल गरेको छ भने पालङ प्रथा रथले ११८ सिट जितेको छ ।
त्यसैगरी फ्युचर फरवार्ड पार्टीले ८८ सिट जित्दा डेमोक्र्याट्स र भुम्जै थाई पार्टीले पचास बढी मात्रै सिटमा विजयी भएको छ ।
थाइल्यान्डको संसदको तल्लो सदनमा ३५० जना प्रत्यक्ष निर्वाचित र १५० जना पार्टीबाट निर्वाचित गरी ५०० जना सांसद रहन्छन् भने माथिल्लो सदनमा २५० जना सेनाले मनोनीत गर्ने व्यवस्था रहेको छ । केही वर्ष अगाडि सेनाले नै बनाएको संविधानमा २५० जना सेनाले सांसद मनोनीत गर्ने व्यवस्था गरिएको हो ।
सन् २०१४ मा भएको सैनिक कू पछि थाइल्याण्डमा गत आइतबार पहिलो पटक आमनिर्वाचन भएको हो ।
पटक पटक सरेर भएको निर्वाचनको निष्पक्षता र वैधानिकतामाथि भने विभिन्न क्षेत्रबाट अहिले पनि प्रश्न उठाइएको छ ।
पूर्वप्रधानमन्त्री थाक्सिन सिनावात्रा, कतिपय स्वतन्त्र अन्तर्राष्ट्रिय पर्यवेक्षकलगायतले मतदान र मतगणनामा त्रुटि रहेको दाबी गरेका छन् । उनीहरूले देशव्यापी रूपमा मतदाताहरूलाई लोभ, त्रास र प्रभावमा पारेको बताएका छन् ।
विवादका बीचमा पनि नतिजा सार्वजनिक भएको छ भने सात पार्टीले बुधबार नयाँ गठबन्धन बनाएका छन् ।
सबैभन्दा धेरै सिटमा विजयी हासिल गरेको फिउ थाई पार्टीकै नेतृत्वमा गठबन्धन गराइएको हो । गठबन्धनमा स्वेच्छिक निर्वासनमा रहेका पूर्वप्रधानमन्त्री थाक्सिन सिनावात्राको समर्थन रहेको फिउ थाई पार्टीसहित अन्य छ पार्टी रहेका छन् ।
सो गठबन्धनका तर्फबाट प्रधानमन्त्रीको उम्मेदवारका रूपमा सुदारात केयुराफानलाई अगाडि सारिएको छ । गठबन्धनले छिट्टै नै सरकार बनाउने प्रयास गर्ने उनले बताए ।
-1732776560.jpg)
