विराटनगर : अखिल नेपाल फुटबल सङ्घ (एन्फा)ले पाँचौँ साफ फुटबल प्रतियोगिता खेल्ने प्रत्येक खेलाडीलाई एक लाख रुपैयाँ नगद पुरस्कार प्रदान गर्ने निर्णय गरेको छ ।
एन्फाको शनिबार साँझ यहाँ सम्पन्न १८औँ वार्षिक साधारणसभापछि आयोजित पत्रकार सम्मेलनमा प्रवक्ता किरण राईले निर्णय सार्वजनिक गरेका हुन् ।
यसअघि पाँचौँ साफ फुटबल खेल्ने खेलाडीलाई प्रदेश सरकारले एक लाख तथा विराटनगर महानगरपालिकाले ५० हजार रुपैयाँ प्रदान गर्ने निर्णय गरिसकेका छन् ।
यसैगरी एन्फाले आर्थिक वर्ष २०७५/०७६ का लागि २३ करोड ७४ लाख ५० हजार रुपैयाँको अनुमानित वार्षिक बजेटसमेत स्वीकृत गरेको पत्रकार सम्मेलनमा जानकारी दिइयो । एन्फा अध्यक्ष कर्माछिरिङ शेर्पाले साफ फुटबल सफलतापूर्वक सम्पन्न गर्न सबैको सहयोग प्राप्त भएकामा धन्यवाद दिँदै प्रदेश १ मा आगामी दिनमा मुख्यमन्त्री आमन्त्रण फुटबल तथा १० देखि १२ वर्ष उमेरका महिलाका लागि फुटबल प्रशिक्षण कार्यक्रम चाँडै सञ्चालन गर्ने जानकारी गराए ।
उनले प्रदेश सरकारको सहयोग प्राप्त भए विराटनगरमा महिला फुटबल प्रशिक्षण एकेडेमी सञ्चालन गर्ने आश्वासनसमेत दिए । विराटनगरको शहीद रङ्गशाला अन्तर्राष्ट्रिय मापदण्डअनुसारको निर्माण सम्पन्न भएकामा खुसी व्यक्त गर्दै त्यसको संरक्षण गर्ने जिम्मेवारी सबैको काँधमा आएको उनको भनाइ थियो ।
साफ महिला फुटबल सम्पन्न गर्न विराटनगर महानगपालिकाबाट एक करोड २० लाख र प्रदेश सरकारबाट ५० लाख रुपैयाँ भौतिक पूर्वाधारका लागि प्राप्त भएको र सोही शीर्षकमा खर्च भएको पत्रकार सम्मेलनमा जानकारी दिइयो । साफ खेलकुदबाट प्रतियोगिता सम्पन्न गर्न एक करोड ६५ लाख रुपैयाँ प्राप्त हुने विश्वास गरिएको छ ।
पत्रकार सम्मेलनमा साफ महिला फुटबलसम्बन्धी सम्पूर्ण खर्च तथा आम्दानी आगामी एक हप्ताभित्र सार्वजनिक गरिने प्रवक्ता राईले जानकारी दिए । यस्तै, एन्फाले खेलकुद पत्रकारिताका लागि तीन दिने प्रशिक्षण कार्यक्रम गर्ने अध्यक्ष शेर्पाले बताए ।
यसैगरी खोटाङ, नवलपुर र मनाङ जिल्लाका फुटबल सङ्घलाई आगामी एक वर्षका लागि पर्यवेक्षकका रूपमा अस्थायी सदस्यता प्रदान गर्ने निर्णयसमेत साधारणसभाले गरेको छ ।
