काठमाडाैं : दीपक–दीपा टिमको छक्कापञ्जा सिरिज २ पुनः प्रदर्शन हुने भएको छ । निर्माता दीपकराज गिरीले आफ्नो फेसबुक वालमा पोस्ट गर्दै आगामी वैशाख १३ गते पुनः प्रसारण गरिने जानकारी गराएका छन् ।
दर्शकहरूको चाहनालाई मध्यनजर गर्दै पुनः फिल्म देखाउन लागिएको गिरीको भनाइ छ । विदेशमा पनि वैशाख महिनाभित्रैमा प्रदर्शन गर्ने फिल्म युनिटको भनाइ छ ।
गत वर्षको दसैंमा रिलिज भएको उक्त फिल्मले उत्कृष्ट व्यापार गरेको थियो । उक्त फिल्मको सफलतापछि धेरै दर्शकले उक्त फिल्म युट्युबमा आउने आशासहित प्रतीक्षारत थिए । तर युट्युबमा फिल्मको प्रतीक्षामा बसेका दर्शकलाई सरप्राइज दिँदै गिरीले हलमै पुनः प्रदर्शन गर्ने जानकारी दिए ।
केही महिनाअघि युट्युबमा कहिले रिलिज हुन्छ भन्ने प्रश्न गर्दा उनको जवाफ यस्तो थियो, ‘हाम्रो चलचित्र प्रदर्शन भएको दुई वर्षपछि मात्र युटुबमा आउँछ । अब, हामी चलचित्रलाई डिजिटल रिलिजका लागि नयाँ उपाय सोचिरहेका छौँ । युटुबमा चलचित्र तीन÷तीन महिनामा रिलिज हुँदा हलमा दर्शकको चाप घट्न थालेको छ ।’
गत वर्षको असोज ११ गते रिलिज भएको चलचित्र ‘छक्का पन्जा २’ ले ‘रेकर्डतोड’ व्यापार गरेको थियो । निर्माता दीपकराज गिरीका अनुसार दुई दिनमै तीन करोड व्यपार गरेको उक्त चलचित्रले प्रदर्शनको १० दिनमा सर्वाधिक व्यापार (१० करोड) गरेको कोहिनूरलाई उछिनेको थियो ।
चलचित्रमा दीपकराज गिरी, दीपाश्री निरौला, प्रियंका कार्की, वर्षा राउत, स्वस्तिमा खड्का, जितु नेपाल ‘मुन्द्रे’, केदार घिमिरे ‘माग्ने बूढा’ बुद्धि तामाङ ‘हैट’, गौरव पहारी, किरण केसी, राजाराम पौडेल, शिवहरि पौडेल, लक्ष्मी गिरीलगायतको अभिनय छ ।
उनको यो निर्णयप्रति भने सामाजिक सञ्जालमा नकारात्मक प्रतिक्रिया बढी आएका छन् । खासगरी युट्युबमा प्रतीक्षा गरेर बसेकाहरुले आक्रोश पोखेका छन् । कतिपयले यसलाई पैसाका लागि गरिएको जनाएका छन् ।
हेर्नुस् ट्रेलर :
प्रकाशित मिति: शनिबार, चैत २, २०७५ ०१:०८
