काठमाडौं : हप्तामा दुईभन्दा बढी फिल्म रिलिज हुने गरेका कारण पनि नेपाली फिल्मले खासै राम्रो व्यापार गर्न नसकेको बहस बेलाबेला नभएको होईन । एकैसाथ धेरै रिलिज हुँदा दर्शक र हल संख्या बाँडिन्छ । हल र दर्शक बाँडिदा प्रत्यक्ष प्रभाव बक्स अफिसमा पर्छ । तर एकैदिन तथा उकै हप्ता रिलिज हुने क्रम अझै राेकिएको छैन ।
यही फागुन १७ मा क्याप्टेन र द ब्रेकअप भिड्दैछन् । भने, चैत २९ मा ए मेरो हजुर ३ र यात्रा एकअर्कासँग भिड्न तयार भईसकेका छन्। अर्को वर्षको जेठ ३ मा पनि ठूलै भिडन्त हुने भएको छ । चलचित्र ‘वीरविक्रम २’ र ‘प्रेम दिवस’ दर्शक र फिल्म क्षेत्रले निकै आश गरेका दुई फिल्म भिड्ने एकैदिनको मिति तय भएको छ ।
योगेश घिमिरे निर्देशित फिल्म ‘प्रेम दिवस’ र मिलन चाम्स निर्देशित ‘वीरविक्रम २’ एकैदिन रिलिज हुने भएको हो। रोचक कुरा त यी दुबै फिल्म लभस्टोरी फिल्म हुन् । दुबै फिल्ममा नाम चलेका कलाकारहरुको प्रमुख भूमिका छ ।
फिल्म ‘वीरविक्रम २’ मा पल शाह, नाजिर हसेन र वर्षा सिवाकोटी लिड रोलमा छन् । हिट फिल्म ‘वीरविक्रम’ को सिक्वेल भएका कारण पनि यो फिल्मप्रति दर्शकको चासो अलि बढी नै छ । ‘प्रेम दिवस’ मा भने रियल जोडी प्रियंका कार्की र आयुष्मान देशराज जोशीको प्रमुख भूमिका छ ।
जेठ ३ आउन अझै केही महिना बाँकी भएका कारण दुईमध्ये कुनै एक फिल्मको रिलिज पोस्टपोन्ड हुन सक्ने र दुई फिल्मको भिडन्त हुने सम्भावना दुबै प्रवल छ । तर, ‘वीरविक्रम २’ र ‘प्रेम दिवस’ एकसाथ प्रदर्शनमा आएको खण्डमा व्यापारिक घाटा दुबै फिल्मले सहनु पर्ने हुन्छ।
प्रकाशित मिति: आइतबार, फागुन १२, २०७५ ०५:५१