काठमाडौं : राष्ट्रिय निकुञ्ज तथा वन्यजन्तु संरक्षण विभागको आयोजनामा मंगलबार माइतीघर मण्डलामा उपत्यकाव्यापी स्थलगत चित्रकला कार्यशाला सम्पन्न भएको छ ।
मण्डलामा भएको स्थलगत चित्रकला प्रतियोगितामा सैनिक आवासीय मावि भक्तपुरका देभिन प्रजापति प्रथम भएका छन् । मोक्षदा स्कुल कुमारीगाल काठमाडौंका रवीन्द्र शाही द्वितीय, विद्या विकास सेकेन्डरी स्कुल भक्तपुरका डुविड प्रजापति तृतीय तथा बौद्ध सेकेन्डरी स्कुल बौद्धका तेन्जिङ डोमा शेर्पा र एम्बिसन एकेडेमी बानेश्वरका अनिता श्रेष्ठले सान्त्वना पुरस्कार पाएका छन् ।
जल, जमिन, जंगल, जलाधार जोगउन जनचेतनात्मक अभियान अघि सार्दै २४औँ वन्यजन्तु सप्ताह ०७६ अन्तर्गत गरिएको प्रतियोगितामा डेढ दर्जन स्कुलका ४८ बढी बालबालिका सहभागी भएको विभागले जनाएको छ । ‘वन्यजन्तु संरक्षणका लागि सहभागिता’ भन्ने नाराका साथ गरिएको कार्यक्रमको उद्घाटन राष्ट्रिय निकुञ्ज तथा वन्यजन्तु संरक्षण विभागका योजना तथा शिक्षा विभागका अधिकृत विष्णुप्रसाद श्रेष्ठले गरे ।
उनले जनचेतनामूलक कार्यक्रममा विद्यार्थीको सहभागिताले समाजमा सकारात्मक प्रभाव पार्ने बताउँदै भने, ‘कला, साहित्य तथा संस्कृतिका माध्यमबाट मानिसलाई वन्यजन्तु र प्रकृति संरक्षणमा सरिक गराउन सहज हुने भएकाले सप्ताहव्यापी अभियानमा प्रतियोगिताको आयोजना गरेका हौँ ।’
विभागका उपमहानिर्देशक गोपालप्रकाश भट्टराईले वन्यजन्तु तथा प्रकृति संरक्षणमा सामाजिक जागरणका लागि चित्रकला प्रतियोगिताले महत्त्वपूर्ण भूमिका निर्वाह गर्ने जनाए । विद्यार्थीभित्र लुकेको प्रतिभा प्रस्फुटन गराउनका लागि प्रतियोगिताको आयोजना गरिएको जनाउँदै कार्यक्रमको संयोजन गरिरहेका साहित्यकार तथा अभियन्ता देवी घिमिरेले आम नागरिकलाई सचेत गराउनका लागि कार्यक्रम गरिएको बताए । उनले भने, ‘प्रकृतिलाई माया गर्ने र यसको संरक्षणमा सचेत नागरिक उत्पादन गर्ने लक्ष्यका साथ अभियान गरिएको हो ।’
प्रतियोगिताका निर्णायक कलाकार नरेन्द्रबहादुर श्रेष्ठले वन्यजन्तु संरक्षणमा गरिएको अभियानमा सबै समुदाय र विद्यार्थीलाई सहभागी गराएर जागरण ल्याउन भूमिका खेलेको बताए । उनले भने, ‘यस्ता अभियानले चोरी निकासी रोक्न र समाजलाई सचेत ढंगले प्रकृति, वन्यजन्तु तथा पर्यावरण संरक्षणमा लाग्न अभिप्रेरित गर्छ ।’
सप्ताहव्यापी अभियानअन्तर्गत सोमबार सदर चिडियाखानामा चित्र कोलाज, मंगलबार मण्डलामा स्थलगत चित्रकला प्रतियोगिता तथा एम्बिसन एकेडेमीको बगैँचामा कविता कोलाज कार्यक्रम गरियो । शनिबारसम्म विविध कार्यक्रम गर्दै समापन गरिने कार्यक्रममा प्रतियोगिताका विजयी बालबालिकालाई पुरस्कार प्रदान गरिने विभागले जनाएको छ । अभियानमा डब्लुडब्लुएफ नेपाल, राष्ट्रिय प्रकृति संरक्षण कोष, सदर चिडियाखाना, जेडेसियल, पंक्षी संरक्षणलगायतका संघसंस्थाको सहकार्य रहेको छ ।
प्रकाशित मिति: बुधबार, वैशाख ४, २०७६ १५:१५
