काठमाडौं : चलचित्र विकास बोर्डले वैशाखको पहिलो हप्तादेखि देशभरका चलचित्र घरमा बक्स अफिस सञ्चालनमा ल्याउने भएको छ ।
देशभर प्रदर्शनमा आएका चलचित्रका कति टिकट बिक्री भयो भन्ने आधिकारिक तथ्याङ्क राख्न नसकेको बोर्डले बक्स अफिस सञ्चालनमा आइसकेपछि केन्द्रमै बसेर त्यसबारे जानकारी लिन सक्ने बोर्डका लेखा अधिकृत प्रभाकर भट्टराईले बताए ।
‘पछि सञ्चालनमा आएका नयाँ चलचित्रघरमा त टिकटको जानकारी कम्प्युटरमा नै अपडेट गरिन्छ तर पुराना घरहरूमा प्रभावकारी रूपमा सञ्चालनमा आउन अलि समय लाग्छ’, उनले भने । कम्प्युटर चलाउन नजान्ने चलचित्रघरका कर्मचारीलाई बोर्डले तालिम दिने जानकारी उनले दिए ।
बोर्डले हाल नयाँ सर्भर बनाउनका लागि म्याक्स इन्टरनेसनललाई जिम्मा दिएको छ । म्याक्सले केही दिनपछि नै नयाँ सर्भरलाई कम्प्युटरमा राख्ने काम गर्ने छ । हाल काठमाडौं उपत्यकाभित्र मात्र बक्स अफिस सञ्चालनमा छ ।
काठमाडौं उपत्यकाभित्र र बाहिर गरी अहिलेसम्म देशभर जम्मा तीन सय ९४ चलचित्रघर छन् जसमा हाल दुई सय १५ मात्र सञ्चालनमा छन् । चालु आर्थिक वर्ष २०७५/०७६ मा १३ नयाँ चलचित्रघर सञ्चालनमा आएका छन् ।
प्रकाशित मिति: शुक्रबार, चैत २९, २०७५ १४:२९
