काठमाडौं : युथ क्रियसन नेपालले ‘मिस्टर एण्ड मिस बेस्ट मोडल अफ द इयर २०१९’ र ‘मिस्टर एण्ड मिस एसईई बेस्ट मोडल अफ द इयर २०१९’ नामक सौन्दर्य प्रतियोगिता गर्ने भएको छ ।
मंगलबार राजधानीमा एक पत्रकार भेटघाट कार्यक्रम गर्दै क्रियसनले दुई सौन्दर्य प्रतियोगिता एकसाथ आयोजना गर्न लागेको जानकारी दिएको हो ।
मोडलिङ क्षेत्र रोजेर भविष्य उज्वल बनाउने सोचमा रहेका युवा युवतीको मार्ग निर्देशन गर्दै मोडलिङका लागि प्रशिक्षण र ग्रुमिङ तयार हुने उचित वातावरण बनाउने उद्देश्य प्रतियोगिताको रहेको आयोजक युथ क्रियसनका अध्यक्ष रवि लामा तामाङले बताए । उनले प्रतियोगितामा अन्य सौन्दर्य प्रतियोगिताभन्दा भिन्न तरिकाले प्रतिभाको मूल्याङ्कन गर्ने सुनाए ।
कार्यक्रममा कोरियोग्राफर रोजिन शाक्यले अन्यभन्दा यी सौन्दर्य प्रतियोगिता केही भिन्न रहेकाले आफू जोडिएको बताए । अन्तर्राष्ट्रिय कोरियोग्राफरको रूपमा समेत परिचित शाक्यले प्रतियोगिताका सहभागीलाई आफूले योग्य र सक्षम मोडल बन्न सक्ने प्रशिक्षण दिने दाबी गरे ।
कार्यक्रममा प्रतियोगिताको आवेदनसमेत खुला गरिएको जानकारी दिइयो । १६ देखि ३० वर्षसम्मका जुनै समुदायका युवायुवतीले आवेदन भर्न सक्ने प्रतियोगितामा सहभागीका लागि एसएलसी र न्यूनतम पाँच फिट उचाइ योग्यता तोकिएको छ ।
‘मिस्टर एण्ड मिस बेस्ट मोडल अफ द इयर’का लागि चैत ८ सम्म आवेदन दिइसक्नुपर्ने र पहिलो चरणको छनोट चैत ९ गते हुने र ‘मिस्टर एण्ड मिस बेस्ट मोडल एसईई’का लागि चैत २२ सम्म आवदेन दिनसक्ने र पहिलो चरणको छनोट चैत २३ गते हुने कार्यक्रममा जानकारी दिइयो ।
आवेदन फर्म एवान क्याफे नयाँबजार, फूलबारी कम्प्लेक्स बौद्ध, क्लिफ क्याफे ललितपुर महल, इलेक्ट्रोनिक होल्ड कमलविनायक, श्रीराम रेडियो टिभी पसल बनेपा, अर्किट ब्युटी पार्लर र आर्टिस नेपाल पुतलीसडकमा उपलब्ध छ ।
अडिसनबाट छानिएका प्रतियोगीलाई व्यक्तित्व विकास, रनवे मोडलिङ, फेसनलगायतका विभिन्न प्रशिक्षणसहित आगामी जेठ ३ गते होटल मल्लमा आयोजना हुने अन्तिम प्रतिष्पर्धामा सहभागी गराइनेछ ।
दुवै प्रतियोगिताका शीर्ष विजेता, फस्ट रनर अप र सेकेन्ड रनर अपले सिल्भर क्राउन, आकर्षक गिफ्टका साथै विभिन्न अवसर पुरस्कारको रूपमा जित्न सक्ने कार्यक्रमका संयोजक सहदेव वैद्यले जानकारी दिए ।
प्रकाशित मिति: मंगलबार, चैत ५, २०७५ २२:१७
